隨著最近EZK Prime League Season 2聯賽隊伍陣容名單提交日截止後，TomorrowLAN團隊找來了為EMC Stand-in的K0NIG接受訪問。
TomorrowLAN: 首先多謝K0NIG接受TomorrowLAN的訪問~~
TomorrowLAN: 想問下K0NIG，你可唔可以分享下今次會重返EMC既故事呢?
K0NIG: 自從19年尾後，我地基本上各自有自己嘢要處理同面對，例如學業，工作，或者係私人嘢，所以都決定當時短時間內唔會再參加任何比賽，去到20年中，大約係五月左右，大家嘅情況穩定返落嚟，無咁忙，而佢地都有嘗試聯絡我，問我有無興趣再一齊玩，但我因為有啲私人問題要處理，同埋事實上我嘅技術亦不足以貢獻比團隊，所以我選擇退出EMC，將位置留比更加合適更加強嘅玩家，而後尾見到KennyGOD嘅加入亦令EMC喺本地CS嘅比賽取得唔錯嘅成績，所以我認為自己當初嘅決定係正確的。
K0NIG: 我諗大概喺2019年尾至2021年頭我都無再參加過任何比賽，甚至無乜心機再玩遊戲。咁喺2021年2月面臨咗一個對人生都幾大影響嘅改變，過咗半年之後(2021年8月尾)終於都迎來一個終結，咁就睇返依半年發生過啲咩，成個圈子變成點等等，咁啱睇到EMC無參加香港大師賽2021，就好奇問下佢地現況，得知佢地現時都無乜再參加比賽，同時KennyGod亦加入了其他本地隊伍，但嚟緊仍然有EZK Season 2嘅比賽，我認為自己心態上準備好重新開始，想挑戰一下自己，所以就主動問咗hypathor同CHIMEI，問下佢地有冇興趣想一齊玩，成件事就係咁。
TomorrowLAN: 你今次重返EMC，目前與隊伍的磨合程度如何?
K0NIG: 因為始終離開咗一段時間，所以一開始都有好多嘢要處理同適應，而其他隊員都有工作在身或者啱啱開學都會比較繁忙，所以現今仍然未有試過一齊練習/玩，我諗都係要靠自己嘅努力去學習同改進，做返啲基本嘢，再加上以前我地都有夾過一段時間，希望能夠應付到。
TomorrowLAN: 你闊別左賽場都一段時間啦，目前有沒有什麼還沒適應?
K0NIG: 離開咗差唔多一年，當然未係能夠完全適應，坦白講我覺得連揸滑鼠嘅感覺都好陌生。相信有好多嘢都改變曬，例如無論係外國定本地嘅隊伍嘅戰術風格都有變啦，地圖嘅細節位改變等等，一時刻未必能夠適應到咁急速嘅節奏，由其是我依家都唔再好似以前咁多時間日日都玩幾個鐘頭，可能兩個星期先得一日係可以放假留喺屋企，未必跟得上大家嘅技術了。
TomorrowLAN: EMC於2019年間已經宣佈了隊伍進入不活躍狀態，而他們過去一年都只參加香港賽事，今次為EMC Stand-in的你會否在未來再次令到EMC參加亞洲賽事或會轉投另一支隊伍重返賽場呢?
K0NIG: 未知，或者會有機會吧，始終我覺得佢地四位都獨當一面，有佢地個人嘅長處同風格，而我認為佢地嘅技術都係香港數一數二勁，見到佢地無再繼續玩都覺得好可惜，當然我都好希望可以能夠同佢地繼續參加CS嘅比賽，從佢地嘅身上學到更加多嘅技巧同知識。
至於轉投另一支隊伍方面，或者都有可能嘅，不過相比執著勝負，反而依家想玩得更加放鬆，更加開心，更加投入。
TomorrowLAN: 你預計今季EMC聯賽之路可以走到多遠呢?
K0NIG: 我知道大家認為EMC唔似其他隊伍咁有心去日日練習，研究啲新戰術，所以難免都會覺得EMC係被高估嘅，依個係事實。我諗唔係每個人現實條件都好到每一日都可以放到四五個鐘頭去練習。我已經隔咗一段時間無再玩，無論技術反應都好，都同新手無分別，反而我好感激佢地仍然肯比機會我再一次參加比賽，所以贏一場又好，贏十場都好，我都只會想投入去享受，能夠同其他前輩或者高手同場較量，都係一種難得嘅機會。
Photo owned by TomorrowLAN
TomorrowLAN: 由你於EZK Season 1 Pre-Season首次參賽之後，今次為EMC Stand-in參加Season 2，香港CS環境有沒有顯著分別?
K0NIG: 其實Season 1 Pre-Season嘅pogchamp，係我睇到報名想玩下，就同兩位ERACOST嘅前隊友ChuChuB，ML，Outlaws嘅Sunday，霸氣的名字，再加上一位平時好少玩嘅中學同學臨時組出嚟。咁當時第一場就遇上Blank，我認為對方都有唔錯嘅實力，有好多戰術，而且打法好謹慎好有條理，所以打起上嚟都好吃力。
K0NIG: 其實依家香港CS環境越黎越多有潛質嘅選手，比起我幾年前玩，依家都出現咗好多年輕嘅新星，無論反應同技術都強好多，現時可以話係一個百花齊放嘅時代，多咗強勁嘅對手，競爭大咗，對於整個圈子嚟講，無疑係一件非常好嘅事。亦都多謝EZK每一位一直為香港CS環境作出非常大嘅貢獻，知道佢地真係用咗好多心機同時間去搞好比賽，改革整個圈子，所以有時如果佢地做得無咁好，希望大家體諒下，依個時代需要大家多多包容同支持，先能夠一直走下去。
TomorrowLAN: EMC為唯一一支聯賽隊伍報名名單中並沒有後備成員，可以分享一下為什麼EMC並沒有提交後備?
K0NIG: 因為我諗佢地本身style都唔係太鐘意同外界接觸，平時都係圍內玩開，好少會主動邀請其他人玩，所以如果你好有熱誠好希望可以進步嘅，我覺得可以試下自薦主動接觸佢地。
TomorrowLAN: 隨著聯賽抽籤出爐，你如何評價A組同組隊伍以及覺得哪支隊伍最難纏?
K0NIG: 有一定嘅難度，始終入到去League都係有一定嘅實力，而亦有好多變數會影響住嗰一場賽局，所以都唔可以輕敵。
K0NIG: 覺得OOW最難纏，始終依隊嘅選手都好有經驗，實力都係香港最頂尖個班，面對住佢地我覺得會好大壓力同恐懼，希望能夠順其自然，好好享受對戰嘅過程，從佢地身上去學習更多。
TomorrowLAN: 如果今次Stand-in聯賽完左之後，K0NIG你日後會有咩打算?
K0NIG: 視乎自己表現如何，我大概估計都未必會如理想般，甚至可能會打得好差都唔出奇。希望自己能夠keep到基本嘅表現，事實上我並唔係以前大家所想咁，係一個好有威脅好dominate嘅一個玩家，即係簡單啲講，係一個pub player lol，某程度都係overrated，所以都係順其自然，做好自己就足夠了。
TomorrowLAN: K0NIG還有話想說嗎?
K0NIG: 之前喺專欄睇到一段說話：「凡人有機會一世都贏唔到天才，甚至係努力嘅天才，但面對天資或者係人種嘅限制，任何人都有身為挑戰者嘅選擇權，可以選擇直接放棄。亦可以即使知道贏唔過都要盡力一搏，可能嘗試過後會有意想不到嘅結果，呢一班凡人取得成就就算遠不如天才，但喺凡人嘅世界裡，他們就是鶴立雞群般嘅耀眼巨星，而且時不時可以擊敗天才，體會到英雄般嘅數秒，這樣的人生其實已經足夠被稱之為『偉大』了。」
TomorrowLAN: 感謝K0NIG接受TomorrowLAN的訪問~
K0NIG: 麻煩了
如想了解更多對CS:GO 的資訊，請密切留意並跟隨我們的社交網站Twitter、Instagram、Facebook及訂閱我們的官方網站推送通知 CSGO.HK以便取得事件最新動態及其他CS:GO最新消息。
