CS:GO 香港大師賽賽事已經圓滿結束，賽後TomorrowLAN團隊找來了Only One Word的Darkkis及Joey接受訪問。
TomorrowLAN: 首先多謝你們接受TomorrowLAN的訪問~~
TomorrowLAN: 你們於首兩場地圖均大勝Yimagen，是你們的打法發揮作用，還是對手還在適應LAN的節奏呢?
Darkkis: 我覺得是後者，即係我覺得是Yimagen當時未warm-up好，咁可能佢地發揮上就未以最好狀態應戰。
TomorrowLAN: 承上題，你們於頭兩張地圖上大勝對手後，其實對OOW而言會唔會對士氣有幫助，或者越打越放呢?
Darkkis: 士氣上就肯定有幫助，因為2比0領先緊，但打法上就唔會太大改變，因為本身都有一定的戰術規模，所以唔會點變。
TomorrowLAN: 今次CroSSX Stand-in Terryyy的位置並有沒有打出你們預期中的效果?
Darkkis: 如果就呢次的比賽講，其實佢整體表現不單指一場 overall都合格既，但當然佢個人能力上就未到 Terryyy的水平，都仲需要改進和可以進步既。
TomorrowLAN: 今次為Joey加入OOW後第一次跟你地去打LAN，Joey對於第一次打CSGO LAN會唔會感到緊張或已經將壓力轉化成動力?
Joey: 本身就好緊張，因為本身係第一次打cs LAN，但因為我之前都打左好多年既唔同遊戲同比賽，例如LOL，所以其實本身打之前就緊張，但上台就冇左d緊張感覺，我既隊友都好support我。
TomorrowLAN: 隨著Joey的加入，他的打法與matcha有沒有分別? 以及隊伍方面戰術有冇不同呢?
Darkkis: 都有D唔同既，因為Joey比我既感覺係比較進攻式既AWPer，對比之前matcha既AWP就係防守式打法，即係以pro player黎比較就係s1mple同device既打法分別。
賽後將會花苦工調整隊伍
Photo owned by TomorrowLAN
TomorrowLAN: Nuke上你們於上半場比較膠著，但是在下半場你們多次以人數優勢失去了好多 rounds，究竟問題出在哪裡?
Darkkis: 有D溝通既失誤，有D既個人細節上的處理問題，例如有一round就係對方1打2既情況，而對方起upper位置放左個one way smoke，明眼人一睇就知道係one way smoke，但CroSSx可能當時無意識到係一個one way smoke，咁然後迅速就出現左一個1v1既局面，之後再輸埋個殘局 ，有好多情況都係類似咁樣。
TomorrowLAN: 承上題，Nuke方面Yimagen起下半場部署左Alex打一個繞後既位置，Alex既繞後對OOW黎講會唔會係一個致命傷，令到OOW回防無所適從?
Darkkis: 其實就唔係既，係一個正常既戰術之下，進攻方會需要一個係做繞後既角色。而Alex既情況係，我地咁啱起對槍既情況下有一個人數損失，而導致可能斷後既成員需要補位，剛好撞到Alex既時機。
TomorrowLAN: Mirage上你們先由領先到落後以及最終於Mirage上落敗，然後在下半場Yimagen好多時間都以一個人數充足的情況下入bomb site，點解會出現依個情況呢?
Darkkis: 因為去到下半場其實個個經濟情況好尷尬既，例如話第一個長槍局為例，雖然我地贏左但道具數量唔多，咁變相我地就選擇一D摸點既戰術去取代正常防守戰術，咁好可惜既係當我們行依D戰術既時候輸左令到經濟重置，之後再到下一個長槍局又係類似既情況，即係經濟情況唔好又導致我們進攻式既戰術發揮唔到作用，最後就出現左Mirage咁既結果。
TomorrowLAN: 與Mirage一樣，OOW於Ancient的賽事上都係出現上面既問題，究竟係隊伍打法既決定或隊伍調動速度問題?
Darkkis: 打Ancient做防守方既時候呢，我地先贏左手槍局但第二局呢就出現左個防守上既失誤，因為依張地圖唔係好熟，加上防守出現問題就比對方有個ECO翻盤，咁然後令到我地經濟崩潰，但因為再加埋前面落後既分數差距，令到隊伍餘下既長槍局數量唔多，咁起一個雪球效應下導致左出現依個情況。
TomorrowLAN: Darkkis可以說是隊中的老將，但你仍然可以在比賽中打出正數殺數，你有沒有什麼竅門保持狀態? (或隨著年紀增長後，打法會唔會有轉變，唔會咁aggressive)
Darkkis: 其實唔打得咁aggressive 依個係有既，首先講依個點樣保持啦，就係玩多D啦即係你自己有空餘既時間未去玩去培養手感，手感依種野有就有，keep唔到都無辦法，依樣係個人既感覺 ，而後者就係打法上係一定會有改變，隨著經驗增加可以由以前比較打得放，依家可能比較保守D，於隊伍打法變左協助型角色唔係攻擊型。
TomorrowLAN: 今次比賽雖然你地就輸左啦，但黎緊有EZK聯賽既比賽，咁你地隊伍未來有咩目標?
Darkkis: 未來首先就有Terryyy歸隊，陣容名單將會更加完整及配合度會再調整，然後再都要落D苦工去睇下隊伍有沒有什麼位置需要改善 。
TomorrowLAN: 多謝Darkkis及Joey接受TomorrowLAN既訪問
如想了解更多對CS:GO 的資訊，請密切留意並跟隨我們的社交網站Twitter、Instagram、Facebook及訂閱我們的官方網站推送通知 CSGO.HK以便取得事件最新動態及其他CS:GO最新消息。
