fbpx
885
0

Joey: 未能與Only One Word一起取得冠軍,算是一個比較大的遺憾。

885
0

隨著最近EZK Prime League Season 2聯賽隊伍陣容名單提交日截止後,TomorrowLAN團隊找來了從OOW重返DNDL的Joey接受訪問。

TomorrowLAN: 首先多謝Joey接受TomorrowLAN的訪問~~

TomorrowLAN: 翻查比賽紀錄,你為Only One Word (100Ping)出戰了一些亞洲預選賽及CSGO香港大師賽,你效力短短幾個月後,想問下Joey點解會選擇離開Only One Word呢?

Joey: 我一開始加入Only One Word既唯一目標就係贏比賽,因為我知道呢一隊每一個人既實力都非常強悍,加上之前一直留係DNDL,想嘗試夾下其他風格既隊伍。至於離隊原因,係比賽前已經與JeffVanB提到比賽後可能會離開,因為我發現自己比起CSGO更加中意Apex Legends,而且亦要兼顧學業,怕之後既比賽和團練未能全部出席,所以離開Only One Word,唔想阻礙隊伍既發展。

TomorrowLAN: Joey你點評價起Only One Word既旅程?

Joey: 四個字,百感交集。由第一日我玩CSGO(大約係2019年7月)我就已經聽過Darkkis同JeffVanB既大名,估唔到有一日可以加入佢地隊伍同佢地一齊努力,感覺係好似見證住自己既成長咁。加入後一開始覺得唔太舒服,因為一開始相處時覺得每個人都難以接觸,好難相處,但係原來係我自己顧忌太多,所以玩熟左之後亦可以融洽相處,可惜既係大師賽未能同佢地一齊取得冠軍既成績,算係一個比較大既遺憾,但無可否認佢地實力的確係香港最頂尖既選手。

TomorrowLAN: 你本身係打LOL出身既選手,依家係一個參加CSGO既選手,咁係由MOBA類遊戲轉戰FPS遊戲,你有冇咩方法可以分享比大家點樣適應一隻新遊戲並可以成為打比賽既選手?

Joey: 作為一個打遊戲冇咩天份既玩家,當初打LOL都係用左5年時間先由銀牌上到菁英,所以我利用左打LOL既發展經驗黎讓自己係CSGO既進步可以更快,我自己既做法就係先不停模仿人地既打法,例如係CSGO世界內模仿不同職業選手既Settings同對槍風格,直到搵到自己適合既,然後再重點練習果個Settings,不停睇人地既Gameplay,我認為呢個方法係最有效而且最快,因為人地係職業選手,已經幫你搵好哂最好既設定,你需要做既只係練熟佢,並唔需要搵自己,因為搵自己既打法實在需要太耐,人生冇咁多年可以純靠自己經驗就玩得成一隻遊戲。

TomorrowLAN: 咁根據Only One Word成員透露你日後將會專注起Apex Legends,而我地翻查EZK Season 2名單,你起Do Not Disturb La既後備名單上,可唔可以分享下你目前起Do Not Disturb La係咩角色或咩情況呢?

Joey: 目前我係DNDL既位置係Awper,但由於我本身想專注Apex Legends同埋學業,所以非常大機會會以後備身份出賽,需要人補位或嘗試新組合時我就會出現,比較少機會會主動上場,除非隊伍人員出現大調動,否則呢個情況會一直維持,而我亦唔介意為呢隊隊伍做長期既輔助成員。

TomorrowLAN: 咁你轉戰CSGO都有一段時間啦,起依段時間入面有冇邊個player你覺得有潛力呢?

Joey: 我認為所有香港隊伍之間既實力差距都慢慢拉近左,可能因為大家比賽既機會多左,多左練習既機會,令所有選手都有參賽既空間來讓佢地自己進步。

我認為同我同期玩CSGO既Destroy有相當大既潛力,先唔評論佢係DNDL既成員,事實上我同佢對賽時間比同隊時間還要多,係我眼中Destroy係一個玩咩都好出色既選手,包括步槍狙一樣出色,但係佢就好似Shroud一樣,長期被壓力或緊張情緒影響自己既發揮,但如果可以用時間鍛練自己既心態同對CSGO既睇法,有信心下一個新星將會係佢,而且仲好年輕,年輕係電競選手最重要既資本之一。

Joey表示如果想專注於CSGO的玩家需要突破技術樽頸之外 還需要懂得面對社群壓力
Photo owned by TomorrowLAN

TomorrowLAN: Joey你日後會有咩打算?

Joey: 我會嘗試將心機放係Apex Legends,希望係Apex Legends可以達到另一個高度,成就另一個身份既自己,就好似當初由LOL轉黎打CSGO一樣。

學業方面亦差唔多完成,如無意外將來會做一名幼稚園老師,希望可以將自己所學既東西傳承比下一代,教導佢地正確既價值觀。 亦希望利用呢兩年既CSGO過程黎改變自己之後對人生既睇法,令自己既人生可以更加出色,聽取人地既批評,學識接受自己既不足,我深信呢種心態唔單止放係遊戲上,放係所有事情上都會非常有幫助。

TomorrowLAN: Joey還有話想說嗎?

Joey: 呢兩年CSGO生涯經歷左好多好多事情,由當初被人誤會係外掛然後被破口大罵,到今天唔理所有人既目光繼續向前走,我希望同所有仍在努力中既CSGO朋友講一個現實D既說話,假如你想係CSGO發展,首先你要相信自己做到,如果你對自己既能力半信半疑,我會建議你重新思考值唔值得放時間精神係CSGO,因為過程中唔單止會一層又一層技術上既樽頸位需要突破,而且還有好多好多唔需要理由就可以唔中意你既haters出現,假如你接受到以上兩點,你就可以放手一試,如果唔係只會係浪費時間。

最後,想多謝CSGO比我好多快樂既時光,讓我認識好多好多朋友,亦感謝有份提拔我既兩位朋友,JeffVanB,p5ych0,冇你地既信任我亦唔會行到呢一步,多謝你地兩位。

TomorrowLAN: 感謝Joey接受TomorrowLAN的訪問~

如想了解更多對CS:GO 的資訊,請密切留意並跟隨我們的社交網站TwitterInstagramFacebook訂閱我們的官方網站推送通知 CSGO.HK以便取得事件最新動態及其他CS:GO最新消息。

4
like
0
love
0
haha
1
wow
5
sad
0
angry